آخر الأخبارأخبار المحافظات

المسؤلون عن اطول مائدة ف العالم يعرضون اسباب ماحدث بالأمس

نشر اليوم المنظمون لمائدة الاسكندريةفي الصفحة الرسمية لهذا الحدث الذي يعرف باطول مائدة في العالم الاسباب التي جعلت الشكل غير لائق بالدرجة الكافية امس وهي كالتالي

-كل الشكر و التقدير للمنظمين اللي نزلوا من بيوتهم من الساعة الواحدة ظهرا (تطوعا ) للمساعدة في تنظيم حدث أطول مائدة في العالم . ناس كتير هاجمتهم و قالت أن التنظيم فاشل من غير مايشوفوا أيه السبب في سوء التنظيم
-دخول الناس كان مفروض هيبقى بكشوفات و كنا مجهزينها عشان هتتوزع على المنظمين المسؤلين عن فتح البوابات بعد تسجيل الموسوعة للريكورد مباشرة لكن بعد صدور قرار بتعميم الدعوة و فجأة نزول عدد كبير من الناس اللي ملتزموش بموعد الحضور منعنا من توزيع الكشوفات خوفا على المنظمين من زيادة العدد و التعرض للضرب من قبل الحاضرين
-بعض المطاعم بدأت بتوزيع الوجبات و تعرضت للهجوم الشديد و بعض سيارات المطاعم تم تكسيرها .. و أكيد ده مش ذنب المنظمين
-احنا لما فتحنا الحجز لعدد معين قولنا أن احنا اخدنا العدد اللي نقدر نوفرله وجبات و ناس كتير هاجمتنا و قالوا الدعوة عامة و هننزل بالعافية .. قولنا أن الناس اللي عايزة تنزل مش هنمنعها بس تجيب وجباتها معاها و أكدنا على ده أكتر من مرة لكن قليل أوي اللي ألتزم بالكلام
-كنا مراهنين على التزام الناس لكن حصل همجية كبيرة لدرجة أن الناس كانت بتجري ورا العربيات اللي هتوفر الأكل و ده خلى مطاعم كتير انسحبت و خافت تنزل وجباتها ..و مش معنى كدا أن مفيش ناس التزمت
-قولنا أكثر من مرة أن احنا مش عاملين مائدة رحمن وأن احنا بنعمل رقم قياسي جديد و أن الأكل مش هو الهدف و احنا عملنا موضوع الاكل ده عشان الناس تنزل تشاركنا و نفطر كلنا سوا
-اكيد مش هنقدر نرضي الناس كلها لكن لازم الناس تبقى عارفة أن كان نفسا نفرح الشعب كله و نرسم البسمة على وجوه الجميع
-أكيد حصل أخطاء مننا لكن لو بصينا على الأهداف اللي كنا أصلا عاملين الحدث عشانها فا أحنا حققنا الهدفين الأساسيين و هما
1- أن الحدث يتم و مايحصلش أي انفجرات أو أي مشكلة في التأمين
2- أن احنا ندخل اسكندرية موسوعة غينيس لأطول مائدة في العالم


-اعتذار خاص لكل المنظمين اللي تعرضوا للضرب و السب من قبل بعض الهمجيين
و عايزين الناس تعرف أن المنظمين دول بذلوا مجهود كبير من غير أي مقابل حتى
الوجبات اللي كانت متوفرالهم معرفوش ياخدوها بسبب الهمجية اللي حلصت
-كل المنظمين هينزلهم شكر خاص بأساميهم و دي أقل حاجة ممكن نعملهالهم
ثم اضافوا
احنا فريق عمل RADIOACTIVE عملنا اللي علينا و بذلنا مجهود كبير جدا طوال العام بداية من شهر يونيو 2014 و حتى يونيو 2015 ده كان أول عمل لينا و قدرنا ندخل موسوعة غينيس للأرقام القياسية و ان شاء الله هنعمل أكتر و أكتر
-كل الحمد و الشكر لله على التوفيق في أول عمل لينا
-شكر خاص للمنظمين اللي تعبوا معانا و كانوا هما السبب في الدخول في موسوعة غينيس للأرقام القياسية
-شكر خاص لكل الناس اللي دعمتنا و اللي هتفضل تدعمنا .. و بنعتذر لكل الناس اللي معرفناش نرضيهم و هاجمونا
-من النهاردة صفحة أطول مائدة هتكون هي صفحة RADIOACTIVE و هنتوصل مع الناس عشان يشاركونا أفكارهم و نكمل الطريق اللي بدأناه
-نسأل الله الزيد من التوفيق في المرحلة المقبلة

كتبت /اية فتح الله ،سوزان فريد

الوسوم

مقالات ذات صلة

زر الذهاب إلى الأعلى
إغلاق
إغلاق