الرئيسية / أخبار عاجلة / الشاعر ….سامح شريف و”التقطوقة “

الشاعر ….سامح شريف و”التقطوقة “

انا و انت مجرد قالب طوب ..
ف الصرح اللى بناه العسكر
ده العيش من غير الحرية ..
بيخلى البنى آدم يكفر
بشروق الشمس ف بكرة الجاى ..
يضطر ساعتها يكون نساى..
و لكنه قبل اما يقرر ..فكر
مأخدش عقاد نافع
قام سلم للأمر الواقع
اللى بدوره موت دافع
بيحرك ساكن جواه
يتألم و الخوف يملاه
ف يلملم ف بواقى الاه
و يكون كام طوبه عريضة
يتخللهم رمل و اسمنت
ويا كرات الدم البيضا
ومن اللى اتبقى من المونه
هيخفأ فى شروخ الروح
و هيعصر على نفسه لمونه
و هيقدر يبنى بنفسه صروح
اكبر م اللى بناها العسكر

*******
بلدنا تشوفها ف مسرح و سيما
بمكياج و مونتاج تبانلك وسيمة
و مهما هتاخد ف ادوار بطوله
بلد فيها كل العاهات مستديمة
*******
اضحك للدنيا.. هتضحكلك
و تغير ف ملامح شكلك
حبها من قلبك تلقاها
ف ثواني بتحل مشاكلك
*******
انتى وقت العتمة نور
بردو وقت الخوف أمان
انتى نبته ف أرض بور
انتى ينبوع الحنان
*******
كلمة بحبك اتقالتلى
اول ما عينك لمحتلى
اول ما دخلتى حياتى
طاقة القدر اتفتحتلى
*******
بتلمسنى أهات الناى ..
و تحضن دمعة مجروحة
ف تطربنى و أقول ازاى
بترسمنى كما اللوحة
و بدخل نشوة الروقان
و احن لنفحة من رمضان
ب ذكر و ورد م القرآن
و قولة وحوى .. ايوحا
و من مزج الخيال بالعلم
و فكرة وجاتلها ف الحلم
تحولنى سناريو ل قيلم
وسايبه نهايته مفتوحة
*******
الناس موتى ..
و أهل العلم أحياء
نسب متفاوته ..
م الهمزة للياء
فى ناس كُمل
و ناس ناقصين
و غرقانين ف بركة
جهل بالاشياء

عن Nehad Adel

شاهد أيضاً

ندوة بكلميم لمقاربة موضوع التراث الثقافي اللامادي بواد نون ومدى تثمينه في أفق تصنيفه

  تشهد مدينة كلميم بوابة الصحراء ابتداء من 22 يوليوز 2018 وإلى غاية 28 منه …